Trampın fotosu Amerika pasportlarında görünəcək

Prezident Donald Trampın portretinin milli park keçidlərində görünməsindən sonra onun şəklinin başqa bir vacib sənəddə - Amerika pasportunda görünməsi planlaşdırılır.

Reyting.az xəbər verir ki, bu barədə məlumatı “Bulwark” yayıb.

Dövlət Departamenti artıq ən vacib sənədin “yenidən dizaynını” tamamlayır. Yeni dizayn siyasətçinin andiçmə portretini özündə birləşdirəcək və ABŞ-ın qurulmasının 250 illiyinin qeyd edilməsinin bir hissəsi olacaq.

Yenilənmiş sənədin maketini artıq “Bloomberg”in baş siyasi müxbiri Annemarie Hordern sosial şəbəkədə dərc edib. Pasportun bir səhifəsində Trampın portreti və imzası, digər səhifəsində isə Con Trambullun Müstəqillik Bəyannaməsinin imzalanmasının məşhur rəsmi olacaq.

CNN Dövlət Departamentinin sözçüsünə istinadla bildirir ki, “Trampın şəkli olan pasport, şəxsən yeniləmək üçün istifadəyə verildikdə Vaşinqton Pasport Agentliyi tərəfindən verilən standart pasport olacaq. Onlayn xidmətlər və digər yerlər mövcud pasport dizaynını saxlayacaq”.

Məlumatlara görə, bu pasportların verilməsinə bu yay başlamağı planlaşdırırlar.

“İyul ayında ABŞ Amerikanın 250 illiyini qeyd edir və Dövlət Departamenti bu tarixi hadisəni qeyd etmək üçün məhdud sayda xüsusi hazırlanmış ABŞ pasportu verməyə hazırlaşır. Bu pasportlar xüsusi dizayna və təkmilləşdirilmiş illüstrasiyalara malik olacaq, eyni zamanda Amerika pasportunu dünyanın ən təhlükəsiz sənədi edən eyni təhlükəsizlik xüsusiyyətlərini qoruyacaq”, - deyə Dövlət Departamentinin sözçüsü Tommy Piggott bildirib.

Pasportlardan əlavə, dəyişikliklər maliyyə sisteminə də təsir edəcək. Məlumata görə, Tramp imzası kağız pullarda görünən ilk prezident olacaq və üzü iki yeni sikkədə zərb olunacaq. 

Prezident həmçinin adını digər sahələrdə, ABŞ Sülh İnstitutundan tutmuş yeni “Tramp sinifli” hərbi gəmilərə və altıncı nəsil “F-47” qırıcı təyyarələrinə qədər fəal şəkildə genişləndirir.

V. Quliyev
 

• Teqlər
• #Tramp
• #pasport