Brüsseldə gərginlik: iki ölkə lideri Rusiya prezidenti ilə təmaslara qarşı çıxır

Avropa paytaxtları Ukraynanın döyüş meydanında üstünlük qazanmasına kömək etmək üçün diplomatiyaya nə dərəcədə üstünlük verilməli olduğu məsələsində fikir ayrılığı yaşayırlar.

Reyting.az “Politico” nəşrinə istinadla xəbər verir ki, Fransa Prezidenti Emmanuel Makron və Almaniya Kansleri Fridrix Merz Avropa Birliyinin Rusiya Prezidenti Vladimir Putinlə dialoqa başlamaq təşəbbüsünü tənqid ediblər.

Bu vəziyyət Avropanın iki ən böyük ölkəsinin liderlərini Avropa İttifaqının (Aİ) digər üzvlərinin bir hissəsi ilə fikir ayrılığına gətirib çıxarıb.

Nəşrin yazdığına görə, Brüsseldə keçirilən və gözlənilmədən mübahisəli xarakter alan sammit zamanı Fransa Prezidenti və Almaniya Kansleri bütün 27 üzv dövlət adından çıxış edən Avropa Şurasının Prezidenti Antonio Kostanın Kremlə müraciət etmək cəhdlərinə qarşı çıxıblar. Bu barədə qapalı qapılar arxasında aparılan danışıqlar barədə məlumatlı olan beş diplomat və Aİ rəsmisi bildirib.

Mənbələrin sözlərinə görə, digər liderlərin əksəriyyəti isə Kostanı dəstəkləyib. Bu mübahisə Aİ-nin Rusiyaya yanaşması və Avropa adından kimin danışmalı olduğu ilə bağlı mövcud gərginliyi bir daha üzə çıxarıb.

Üç rəsmi bildirib ki, Rusiyaya qarşı ən sərt mövqe nümayiş etdirən ölkələrin, eləcə də Danimarka və Niderlandın liderləri Makron və Merzin mövqeyini dəstəkləyiblər. Bəzi iştirakçılar isə Kostaya qarşı görünməmiş narazılıq ifadə ediblər.

“Avropa İttifaqı bu danışıqlarda vasitəçi rolunu öz üzərinə götürə bilməz. Alternativ kanalların və ya qeyri-rəsmi diplomatik yolların zəruri olduğu barədə düşüncə yanlışdır. Tarix diktatorlarla alternativ danışıqlar mexanizmləri yaratmaq cəhdlərinin uğursuzluğunu göstərir”, - Estoniyanın Baş naziri Kristen Mixal bildirib.

Eyni zamanda, Aİ-də bir neçə aydır ki, Putinlə hansı səviyyədə əlaqələrin qurulmasının mümkün olduğu və belə təmaslara kimin rəhbərlik etməli olduğu barədə müzakirələr aparılır.

Məqalədə qeyd olunur ki, ABŞ Prezidenti Donald Trampın İranla ilkin sülh razılaşmasına nail olmasından və Fransada keçirilən G7 sammitində diqqətini yenidən Ukraynaya yönəltdiyini bildirməsindən sonra bu məsələ daha da aktuallaşıb.

Beş rəsmi şəxsin sözlərinə görə, Antonio Kostanın aparat rəhbəri Pedro Lurti son həftələrdə Moskvadakı rəsmilərlə iki dəfə əlaqə saxlayıb. ABŞ-ın vasitəçiliyi ilə Rusiyanın Ukraynaya qarşı müharibəsinin dayandırılması istiqamətində səylərin zəifləməsi fonunda Avropa paytaxtlarında diplomatiyanın və ya hərbi dəstəyin prioritet olması barədə fikir ayrılığı yaranıb.

Beləliklə, cümə axşamı keçirilən müzakirələr Aİ daxilində iki əsas düşərgənin formalaşdığını göstərib. Makron və Merz hesab edirlər ki, hazırda Putinlə danışıqlar aparmaq üçün uyğun vaxt deyil və belə bir mərhələ yetişərsə, təşəbbüsü Fransa, Almaniya və Böyük Britaniya öz üzərinə götürməlidir.

Aİ rəsmilərindən birinin sözlərinə görə, çoxsaylı digər liderlər isə bunun məhz Avropa Birliyinin institusional rolu olduğunu vurğulayaraq Kostanı dəstəkləyiblər.

“Əsas sual Putinin danışıqlara hazır olub-olmamasıdır. Kostadan başqa heç kim Avropa Birliyini təmsil edə bilməz. Əgər Putin danışıqlara hazır olduğunu göstərərsə, o zaman növbəti addımlarla bağlı yenidən qərar verməli olacağıq”, - Belçikanın Baş naziri Bart De Vever bildirib.

Y. Qacar
 

• Teqlər
• #Brüsseldə gərginlik
• #iki ölkə lideri Rusiya prezidenti ilə təmaslara qarşı çıxır